Davao City – Padayon ang gihimong imbestigasyon sa Hagonoy Municipal Police Station sa Davao del Sur kabahin sa bag-ong natawo nga batang lalaki nga napalgang patay niadtong Pebrero 8, 2023 sa irrigation canal sa Purok 8, Brgy.Poblacion, Hagonoy.
Sa interbyu sa DXDC RMN Davao kang Pat Al Camporedondo, investigator sa Hagonoy Police Station, nga hangtod karon wala pa mailhi ang ginikanan sa maong bata.
Segun ni Camporedondo nga nagpatabang na sila sa Health Center sa Hagonoy aron pagsubay sa record sa mga babayeng buntis nga posibleng nanganak niadtong Pebrero 8,2023.
Gidugang niini kun mapamatud-an og mailhan ang inahan sa maong bata posibleng mag-atubang kini og kasong infanticide.
“Kung naay nakahibalo palihug lang og duol diri sa atoang Municipal Police Station kung kinsay posibleng mahimong suspek sa maong paglabay sa bata,” sulti ni Camporedondo.
Sa karon, ang bata naa sa Angel Funeral Home,Digos City og gitakdang ilubong sa Hagonoy Municipal Cemetery.
RadyoMaN Don Pulayao
Facebook Comments
