Davao City – Subling gikundina sa Karapatan Southern Mindanao Region (Karapatan-SMR) ang pagsaka sa kaso sa pagpatay dili lamang sa mga tawo nalambigit sa iligal nga droga apan bisan pa sa mga liders sa militanteng pundok.
Sumala ni Karapatan-SMR Secretary General Jay Apiag nga taas kaayo ang kaso sa extrajudicial killings (EJK) ubos sa administrasyon ni Presidente Rodrigo Duterte pinaagi sa kampanya kontra droga.
Segun ni Apiag nga wala mapunting ni PRRD ang pinaka-ugat ngano midula ang mga drug pushers ug paglutos sa tag-as nga mga opisyal sa gobyerno nga nahimong protektor sa mga sindikato sa droga.
Mao nga gihagit ni Apiag si Philippine National Police (PNP) director General Ronald ‘Bato” Dela Rosa nga dawaton ang pangagpas sa mga tawo nga wala misukol ang mga drug pushers sa matag anti-drug operations.
Alang ni Apiag nga nagpalusot ug buot na lamang tabunan ni General Bato ang kapakyasan ug rampant nga pagsupak sa tawhanong katungod sa kampanya kontra droga sa administrasyon ni Duterte.
Dili daw malimod nga wala miagi sa due process ug gituyo og patay sa kapulisan ang mga drug pushers apan gipaagi lamang sa lehitimo nga anti-drug operations aron dili mahalata ang EJK.
Dugang sa secretary general nga ang pagpadayag sa obserbasyon sa publiko nagpakita sa reyalidad nga nagka-anam-anam na og kawala ang pagsalig sa katawhan nga maghatod unya sa negatibo nga epekto sa prayoridad nga mga programa ubos sa panggamhanan ni PRRD.
RadyoMaN Joel Viray
