Davao City – Gisupak sa Victims of Justice, Criminality, and Terrorism In Mindanao Incorporated ang paghatag og reward money sa upat sa unom ka suspek sa pagpatay kang Ako Bicol Partylist Representative Rodel Batocabe.
Gipalagan ni Convenor Arthur Tariman ang pagtunol og multi-million peso nga ganti sa upat ka suspek gumikan lang kay ilang gitudlo si Daraga Albay Mayor Carlwyn Baldo nga maoy mastermind ug nagsugo kanila aron patyon si Batocabe bugti sa lima ka milyon ka pesos nga bayad.
Sumala ni Tariman, ang kriminal kinsa mi-angkon sa sala dili takos hatagan og ganti ug gani mas dut-an pa kini og kaso aron ma-preso isip bayad sa ilang pagpatay sa Bicolanong magbabalaud sa ingon maangkon sa pamilya ug kabanay ang ilang gisinggit nga hustisya.
Mas labaw nang dili maayo ang paghatag og ‘reward money’ ngadto sa mga suspek kung ang gibasehan mao lang ang ilang pagkanta sa nagmando kanila nga patyon si Batocabe sanglit gikinahanglan pa kini pamatud-an sa hukmanan pinaagi sa bug-at nga mga ibidinsiya.
Busa, gibarugan ni Tariman ang kaso nga gisang-at batok kang Baldo tungod kay lagmit mabalibag ra gihapon sa basurahan ang kaso nga gipasaka.
Kahinumdoman, gipusil-patay si Batocabe sa mga armado kinsa nag-bonnet og itom samtang nanghatag og Pinaskuhan sa lungsod sa Daraga Albay alas-3:00 sa hapon niadtong Disyembre 22, 2018.
Mitahan sila Henry Yuson, Rolando Arimado, Danilo Muella, Christopher Naval, Emmanuel Rosello ug Jaywin Babor ngadto sa nasudnong kapulisan ug gikanta si Baldo nga maoy nagsugo kanila aron patyon si Batocabe human wala mabayri ang kulang nga gisaad nga salapi.
RadyoMaN Joel Viray
