Diretso sa detention facility ng Kamara si Bauan, Batangas Mayor Ryanh Dolor pagdating niya kaninang madaling-araw sa Ninoy Aquino International Airport o NAIA Terminal 1 mula sa Los Angeles, California.
Ang pag-aresto kay Dolor ay pinangunahan ng House Sergeant-at-Arms katuwang ang Airport Police, Criminal Investigation and Detection Group (CIDG) at Bureau of Immigration (BI).
Ayon kay House Sergeant-at-Arms retired police Major General Napoleon “Nap” Taas, ang pagdakip kay Dolor ay alinsunod sa contempt at detention order laban sa kanya ng Kamara.
Si Dolor ay pinatawan ng contempt at pinaaresto ng House Committee on Public Accounts na pinamumunuan ni Abang Lingkod Party-list Rep. Joseph Stephen Paduano.
Dahil ito sa paulit-ulit na hindi pagsipot ni Dolor sa mga pagdinig ukol sa umano’y iregularidad sa kasunduan sa pagitan ng lokal na pamahalaan ng Bauan at Aquadata Inc. para sa pagsasapribado ng Bauan Waterworks System.
