General Santos City– Kabahin na sa mga Force Multipliers ang Barangay Covid Control Forces kon BCCF, kini ang gibutyag ni Police Capt. Robert Fores, Spokesperson sa Gensan City Police Office (GSCPO).
Ang mga BCCF matud pa maoy mamahimong kaabag sa kapulisan sa pagpatuman sa balaud partikular na sa implementasyon sa pagsul-ob sa face mask, physical distancing ug ang pagdili sa pag-angkas sa motorsiklo.
Matud sa opisyal nga ang mga miyembro sa BCCF ang gihatagan ug katungod nga mangita sa tanang mosupak sa maong mga regulasyon. Subay sa impormasyon nga nakuha sa GSCPO, adunay 12mil nga mga ID nga gi-imprinta ang LGU Gensan alang sa mga miyembro sa BCCF.
Sila ipang-deploy sa matag purok ug gitahasan usab sila nga mutabang sa kapulisan sa pagbantay sa mga Quarantine Controlled Point sama sa mga Quarantine Facility.
Nasayran nga kulang gyud ang ihap sa kapulisan ug mga personahe sa Rural Health Unit (RHU) rason nga dakong tabang ang presensya sa mga BCCF.
Kalabot niini, gibutyag ni Capt. Fores nga otorisadong mangdakop ang mga BCCF ilalom sa balaud pinaagi sa Citizen’s Arrest, pwede nilang dakpon ang kinsa mang musupak sa balaud.
Aduna usab 2mil ka pesos nga allowance ang mga miyembro sa BCCF, apan gibutyag ni Fores nga gamay lang ang maong kantidad kung itandi sa ilahang trabaho.(LVR)
