BDRRMC Crossing Bayabas: Babaye nga natulog sa ilawom sa tulay, wala maanod sa baha

Davao City- Giklaro karon sa Barangay Disaster Risk Reduction Management Council (BDRRMC) Crossing Bayabas nga wala maanod sa baha ang babayeng natulog ilawom sa tulay nga nahitabo pa niadtong adlaw’ng biyernes sa miaging semana.

Matod kang BDRRMC Head Kagawad Salvador Cadavas Jr., nga hapit ra maabtan sa bulhog sa tubig baha ang babayeng nagpahuway ug nagpahangin ilawom sa tulay ug napukaw ra kini sa iyang mga kaubanan niadtong higayuna.

Gani, giingon ni Kagawad Cadavas nga wala na nila maabti pa ang naasoy nga Babayeng ginaba-banaang anaa sa 40 anyos human makaiktad.

Nasayran, nga gihimong puy-anan sa Tribung Ata-Manobo nga taga-Talaingod Davao Del Norte kansang galimos sa Toril Poblacion, ang ilawom sa tulay.

Suma sa Kagawad, gibadlong na sa ilang kapitan ang mga lumad nga dili mag-pundo ilawom sa tulay tungod sa piligro panahon mudako ang level sa sapa.

Ug aron masiguro dili na makabalik ang mga lumad sa ilawom sa tulay, plano karon sa Barangay Crossing Bayabas nga butangan og cyclone wire ang entero palibot sa ubos sa tulay, sigun ni Kagawad Cadavas Jr.

RadyoMaN Joel Viray