Behikulo nga nakabangga ug misibat gisuta sa LTO XI

Davao City – Gisuta na karon sa Buhangin Police Station sa Land Transportation Office Davao Region ang plaka nga LHH 294 sa behikulo nga nakabangga og laing sakyanan nga nahitabo sa Amakan, Cabantian pasado 10:00 sa buntag.

Ang reklamante mao si Joel Bangoy ug nagpuyo sa Molave Homes, Indangan, Davao City kinsa tag-iya sa sakyanan nga gibanggaan sa Crosswind Isuzu LHH 294.

Matod niya nakaguba pa sa iyang tablet ang driver dihang iya kining gikonpronta dungan sa pagsibat palayo sa hitaboan.

Suma sa ni Bangoy paingon unta kini sa Buhangin Proper dihang kalit nag-overtake kaniya ang Crosswind apan naigo ang kilid sa sakyanan sa biktima hinungdan iya kining gigukod.

Dihang naabtan niya ang suspek, imbis mangayo og dispensa tungod sa panghitabo mao pa hinooy nasuko ug giwakli niini ang iyang tablet.

Apan maayo na lang kay nakuha ni Bangoy ang plaka sa maong behikulo nga karon ginasubay na sa Buhangin PNP ngadto sa LTO XI aron mailhan ang driver ug patubagon sa damyos nga nahimo niini sa sakyanan sa complainant.

RadyoMaN Joel Viray