Davao City – Gumikan sa pagkanaug sa performance and trust ratings nga nakuha ni Pres. Rodrigo Duterte sa pipila ka survey, gikinahanglan ang mas agresibong klase sa mensahero nga maoy mopasabot sa katawhan mahitungod sa mga isyu nga padayong nagahasi sa administrasyon.
Kini maoy panglantaw karon ni Ateneo de Davao University (ADDU) political science professor Ramon Beleno III atol sa interbyu kaniya sa tulumanong ‘Straight to the Point’.
Si Beleno nagtoo nga napili si newly-installed presidential spokesperson Harry Roque tungod sa iyang maisogong kumbiskyon sa pag-istorya ug pag-explikar sa iyang mga punto sanglit usa man siya ka abogado diin nasabtan usab niya ang ‘legal framework’ nga parehong gipanukaran nila sa pamuno-nasud.
Dugang pa sa propesor nga si Roque usa ka iladong international human rights law practitioner busa mas maka-deliberate siya sa nagkadaiyang isyung naglimin diha sa kontrobersyal kaayong war on drugs sa Duterte regime.
Nagtoo ang Ateneo political analyst nga dili mahitabo nga isugal ni Roque ang iyang kredibilidad sa akademya ug sa iyang law practice gani nagpasabot lamang kini nga adunay igong basihan-legal ang anti-drug campaign ning gobyernoha.
RadyoMaN Jason Amisola
