Davao City – Gikumpirma karon sa Davao City Social Welfare & Development Office (CSWDO) nga aduna silay nadawat nga mga taho sa pagpangabuso o domestic violence kun pagpangdagmal sulod mismo sa mga panimalay taliwala COVID-19 pandemic.
Gibutyag karon ni CSWDO Head Malou Bermudo nga tungod sa naagiang pandemic, daghan ang nawad-an og panginabuhi ug naapektuhan ang panarbaho nga gilantaw usab nga malagmit usa sa rason kun kawsa nga mosangpot sa kaguol ug kabalaka nga kon dili ma-manage kun ma-rendahan ug ensakto, posibleng musangpot sa dili pagkasinabot sulod sa pamilya.
Aron malikayan ang pagpangdagmal o panag-away, lig-onon gayod sulod sa panimalay ang komunikasyon o panag-diyalogo tumong ang pagresolba sa problemang nahimugso bunga sa fatal disease, matud ni Bermudo.
“Naa ‘ta karon sa panahon sa pandemic, naa ‘tay COVID-19… Somehow nakaapekto ni siya sa panginabuhi, in providing for food on the table for their family… Mas maka-add up ni siya sa sitwasyon, sa problema within the family. But dili pud na siya himoong rason nga pwedi ka nang mangdagmal, pwedi kang mag-abuso sa imong isig kaingon, sa imong kauban sa inyong balay,” saysay pa ni Bermudo.
Apan kung dili na kayang i-handle ang nasinatiang anxiety, trauma, depression or susamang problema, giawhag karon ni Bermudo ang publiko nga mudangop gilayon ngadto kanila gumikan andam ug tagana sila nga mo-asistir diha sa pag-provide og psycho-social support and interventions alang sa mga labaw’ng nanginahanglan niini.
Alang sa inyong concern, mamahimong motawag sa CSWDO Psycho-Social Support Lines: Globe – 09776542245 o SMART – 09610757968.
RadyoMan Aimee Guinita
