Davao City – Daku ang posibilidad nga maabusohan ang mga tawo nga nidangop karon diha sa online selling and buying sa pagpamalit sa ilang mga kinahanglanon karong panahona.
Sumala ni Simplicio Sagarino, Davao City Anti Scam Unit chief, kasagaran sa mga milambigit sa online selling mao kadtong wala na makabalik sa ilang trabaho samtang ang mga buyer diha na lang nagapalit tungod kay ang ubang mga establisemento karon nga nag-abli, limitado ang ginapasulod tungod sa gipatumang health protocols.
Giklaro ni Sagarino nga anaa gayuy mahitabong mga pagpang-abuso ilabi na nga dili nimo makita ingon man walay magpugong sa taas nga presyo tungod kay i-deliver na man sa inyong tugkaran ang mga item nga gipamalit.
Nagpasidaan karon ang hepe sa Davao City Anti Scam Unit nga magbantay kitang tanan aron dili kita mabiktima sa mga binuang.
Nagpasalig usab ang maong opisyal nga andam motabang ang ilang opisina sa higayong adunay mamahimong biktima sa mga badlungong tawo.
RadyoMaN Bernard Pantallon
