Davao City – Gikumpirma sa Bureau of Fisheries and Aquatic Resources (BFAR)-Davao Region nga dili lang bugas, bombay ug uban pang produktong agrikultura ang ginaangkat sa nasud sa Pilipinas gikan nasud China apan lakip na ang mga isda sama sa galunggong nga mapalit sa merkadohan.
Apan sumala ni BFAR 11 Director Fatima Idris nga walay mga isda sama sa galunggong nga inangkat gikan China mapalit sa merkadohan sa Rehiyon Onse tungod ang Luzon area lang ang ga-import niini.
Matud ni Idris nga walay mga negosyante og isda sa merkadohan gitugotan nga magkompra og isda sa ubang kanasuran sama sa china diin makalaom ang publiko nga gikan sa kadagatan sa Mindanao ug sa nasud ang mga isda gibaligya sa mga palengke.
Ug makasalig matud pa ang katawhan nga walay sambug nga formalin ang mga isda ug ice lang ang nag-silbing preserbatibo sa mga isda busa luwas kini kaonon sa publiko.
Ug kung ugaling giligoan og formalin ang mga isda aron mapreserba ang kapresko niini dili kini makasud sa mga pampublikong merkadohan gumikan sa hugot nga monitoring sa City Veterinarian’s Office ug sa tagsa-tagsa ka mga market masters sa mga palengke dinhi.
Ang dili lang maayo nga taho alang sa tanan mao ang pagpasaka sa presyo sa matag kilo sa isda sama sa galunggong hatud sa epekto sa pagsaka sa presyo sa produktong petrolyo ingon man malagmit gumikan sa TRAIN Law.
RadyoMaN Joel Viray
