Davao City- Opisyal na giablihan sa Bureau Fire Protection 11 ang ilang bag-ong Fire Operation Command Center uban ang pagturn over sa mga ekipo nga gidonar sa nagkadaiyang sektor sa katilingban.
Gipangunahan ni DILG Officer In-Charge Eduardo Año ang launching ceremony sa FOCO ug pagdawat sa gidonar nga mga ekipo nga gipahigayon sa BFP 11 Headquarters sa may Sta.Ana Avenue karon buntag.
Nahimong pinasidunggang bisita sa mao nga kalihukan ang mga representante gikan sa Filipino-Chinese Business Council, Philippine Chamber of Commerce and Industry, Fire Fighter For Christ International, RDRRMC 11, Local Government Unit, ug uban pa.
Subay ani, gipresentar usab ang nalagdaan nga nagkadaiya nga Memorandum of Agreement alang sa dugang ayuda sa pag-improbar sa mga kagamitan, paggamit og luna alang sa pagbansay, ug abilidad sa pagresponde sa mga firefighters.
Kabahin sa gipangdonar ang unom ka drones, fire breathing mask, rescue beddings, ug uban pa nga mga kagamitan.
Kabahin sa makadasig nga mensahe ni Secretary Año mao ang pagtawag niya sa mga firefighters nga hero ug bag-ong bayani aning panahona.
Gikumpirma pa sa opisyal nga gipirmahan usab ni Pangulong Rodrigo Duterte sa miaging tulo ka semana nakalabay ang usa ka bilyon ka pesos alang sa dugang lima firefighter canons, ug 10 fire-truck ladders.
Giingon pa ni Fire Fighter For Christ International President John White nga andam nila bansayon ang mga fire fighters sa dakbayan sa Dabaw aron mahasa ang ilang kahibalo sa pagresponde sa sunog ilabi na sa pagsalba sa kinabuhi sa matrap sa masunog nga gambalay.
RadyoMaN Joel Viray
