Sa interbyu sa DXDC RMN Davao kang Senior Fire Officer 4 (SFO4) Ramil Gillado, hepe sa Intelligence Investigation Section sa Davao City Fire District, gibutyag niini nga ubay-ubay ang mga aktibidad sa kabomberohan sama sa pag-showcase sa ilang kahimanan sa dakong mall sa Ecoland ug Lanang, ning syudad sa sunod bulan.
“Naa ‘tay kick-off ceremony sa March 1. Then, naa ‘tay mga pagabuhaton nga ginatawag namo nga Fire Square. Kanang mall show,” sulti niini.
Matud ni Gillado nga gawas nga makita sa mall goers ang ilang kagamitan, mamahimo usab nga makat-on ang publiko paunsa mag-CPR (Cardiopulmonary resuscitation), mag-first aid, paggamit og fire extinguisher, ug ang highlight mao ang pag-experience sa rappelling gamit ang pisi gikan sa taas paubos nga maoy ginahimo sa ilang mga personahe.
Dugang sa BFP official aduna usay himuong Fire Olympics sa Marso 23-24 diin adunay mga grupo nga mag-compete pinaagi sa pagpakita sa ilahang kapabilidad sa pagresponde sa sunog ug abilidad sa pag-rescue.
Gipasabot sa kabomberohan nga dili lang sa Marso, kundili angay ikonsidera sa katawhan ang matag adlaw, isip Fire Prevention Day.
RadyoMaN Kirby Manzon
