BFP: Fire response ‘pahirapan’

25

Davao City – Gi-angkon karon sa Bureau Fire Protection (BFP) Davao Region nga mosagubang gayod sila’g problema matag higayong mo-responde sila sa mga sunog gumikan sa mga sakyanan nga naga-parking diha sa mga barangay roads.

Mao kini ang rason nganong malangay og abot ang mga firetruck sa mga lugar nga masunogan bisan og paspas ang ilang pag-responde ug kung makasulod man, maglisod na og palong ang firemen sa kalayo.


Gibarugan ni BFP-XI Spokesperson Fire Inspector Shaira Borja nga makonsidera nga public roads ang dalan sa barangay ug dili iya sa mga pribadong inbidiwal ug tanang makababag matawag na nga road obstructions.

Mas daghan pa untang mga balay ug mga kabtangan sa mga residente ang masalbar kung makasulod pa lamang unta sa fire scene ang mga firetruck apan tungod sa obstruction, dili na kini sila masalbar pa.

Gikalipay karon sa BFP-Davao ang 75 ka adlaw nga road clearing operations sa Department of Interior and Local Government (DILG) sa tanang LGUs aron limpyohan ang dul-an 7,000 ka dalan sa tibuok nasud.

Nagtoo ang tigpamaba sa BFP nga kaya sa kagamhanang lokal ug sa mga barangay officials ang paglimpyo sa tanang nakaharang sa mga dalan nga ilang nasakupan kana kun magbaton sila’g political will.

Gidasig sa opisyal ang matag LGU nga mosanong kun musunod sa DILG order ug ipatuman ang road clearing campaign sa ilang mga lugar aron dili makasohan ug matanggal sa ilang mga katungdanan kun puwesto.

RadyoMan Joel Viray

Facebook Comments