Davao City- Gipasalig karon sa Bureau of Fire Protection (BFP-XI) nga padayon pa nilang gisuta karon ang nag-unang kawsa ingon man damyos sa nahitabong NCCC Mall fire incident nga nikalas sa 37 ka mga kinabuhi.
Segun ni BFP Davao chief Wilberto Kwan Tiu, ila pang gi-determinar sa nagpadayong imbestigasyon ang kinabuk-ang kantidad sa damyos sa mall nga gihulagway nga nakasinati sa ‘total demolition’ gumikan sa halapad nga distrosong nasinatian sa maong balay-pamatigayon.
Matud sa hepe sa kabumberohan, ila pang i-determinar ang kinabuk-ang kantidad sa damyos sa mall.
Sa inisyal nga imbestigasyon, gikataho nga nagsumikad ang sunog sa may furniture section sa 3rd floor.
Matud sa BFP official, daghan pa silang pagahimoong mga proseso sa imbestigasyon aron masuta kung asa ang ‘point of origin’ sa sunog ug aron mas dali nga mahibaluan ang hinungdan niini.
Agig tubag sa alegasyon ug accounts sa pipila ka mga survivors sa maong delubyo nga wala niganar ang fire alarm, water sprinkles ug uban pang mga timailhan sa sunog, gisugilon sa fire bureau chief nga usa kini sa ilang tutukan kung nahatagan ba gayod og igong emergency response ang tanan sanglit adunay nakaluwas sa ilang kaugalingon mientras ang 37 nga namatay pulos na trap sa may 4th floor area diin nahimutang ang SSI.
RadyoMaN Aimee Guinita
