Davao City – Mokabat na sa kapin 126-M ka pesos ang kinatibuk-ang damyos sa sunog sa Rehiyon 11.
Kini ang gibutyag ni SF03 Ramil Gillado atol sa ekslusibong pakighinabi sa DXDC News Team kaniya kinsa miingon nga sagad sa rason sa sunog mao ang electrical-related cases nga gisundan sa napasagdaang niluto.
“Naa tay reported 393 fire incidents from January-April region wide then 167 ang residential,” saysay niini.
Samtang dinhi sa Davao City, anaa na sa 192 ka mga insidente sa sunog ang nahitabo diin sagad usab nalambigit mao ang residential areas.
“Naay mga bulan nga nisaka siya tapos naa poy bulan nato last year ug karon nga tuig medyo wala pod siya nisaka pero sa total is medyo nisaka gyod ta karong tuiga,” segun niini.
Gumikan sagad sa sunog mao ang electrical related, subling nagpahimangno si Gillado ngadto sa katawhan nga mamahimong actively conscious sa mga gadgets ingon man i-unplug ini’g human gamiton ug kanunay’ng ipa-check sa certified electricians ang wiring sa kuryente sa panimalay.
Dugang niini, gikanayon ni Gillado nga aduna usab insidente sa sunog nga nalambigit ang bata gani nag-awhag kini sa mga ginikanan nga ibutang ang mga posporo, lighter, kandila ug uban pang hinungdan sa sunog sa mga lugar nga dili maabot sa bata aron likay sa sunog.
RadyoMaN Jason Amisola
