TACLOBAN CITY – Aminado an Tacloban City Fire Marshal nga mayada mga Boarding House ha syudad han Tacloban nga waray pa ka-iinspeksyon han ira buhatan mahitungod nga waray ini mga Business Permit nga ginkuha tikang ha Tacloban City Hall.
Ini in matapos panginanuon han RMN ha nasabi nga buhatan kun tanan ba nga mga Boarding House ha syudad in napapanginano han ira buhatan kasunod han pagkasunog han usa nga boarding house nga namumutang ha Juan Luna St. kun diin faulty wiring an rason.
Sumala kan SFO3 Raul Pelingon, Chief han Fire Safety Enforcement Section nga tanan nga Boarding House nga naagi ha legal nga proseso pinagi ha pagkuha hin business permit in nai-inspeksyon han ira buhatan labot la han mga waray permit.
Pahimatngon han opisyal nga kun narequest an usa nga Barangay Official ha ira buhatan nga inspeksyunon an usa nga Boarding House in dayon ini nira ginkakadto.
Pahinumdom naman han opisyal ha mga nagtatag-iya hin Boarding House nga magin responsable ha pagpanginano ha mga electrical wiring ngan mga appliances nga gingagamit han mga boarders ha sakob han ira Boarding House agud malikyan an disgrasya.
