Davao City – Wala masayod ang usa ka Barangay Health Worker kun BHW kun haing dapita maungot ang Social Amelioration Program kun SAP distribution, sa buhatan ba, sa Department of Social Welfare and Development kun DSWD o sa opisina sa Brgy. kapitan.
Sumala ni Alchie Dumagunot, BHW sa Brgy. Talomo nga human nila mahatag ang SAP form ngadto sa mga kandidatong beneficiary, ang DSWD na ang mu-validate niini kun ang usa ka aplikante kwalipikado nga mudawat sa financial assistance.
Matud ni Dumagunot nga daghan gyud ang nagbagolbol ilabina kadtong dili mahatagan sa SAP form tungod kay limitado ra usab ang mga porma nga gihatag sa DSWD nga dili makuridas sa pag apod-apod ang mga apektado sa lockdown sa ilang purok sa brgy. Talomo, Davao City.
“Maluoy man ko Sir pero wala man kay mahimo kay mao ra pud ang akung nadawat nga form sa DSWD. Lisud kaayo i-explain sa tawo Sir ilabina karon nga nagpait bitaw. Makaingun ka ba nga diri makita kung unsang klase ang tawo. Unsang klase-klase sa batasan sa tawo imong makit-an. Awayon mi intrigahon mi nga mao daw wa mi maguol mga BHW kay gikuot na daw ang among mga pangalan naa na daw mi form ba” segun ni Dumagunot.
Gidugang ni Dumagunot nga mas maayong tapukon usa ang tanang katawhan sa matag purok diin pangunahan sa purok leader aron sa ingun mapasabot sa kadaghanan sa mga personahi sa DSWD ang mga guidelines ug mga rekisitos sa SAP aron mapadali ug dili magbalik-balik sa pagpasabot sa proseso.
RadyoMaN Erin Lumosbog
