Tuloy-tuloy ang pakikipag-ugnayan ng Bureau of Immigration (BI) sa mga local government units (LGUs) at iba pang government agencies para hindi makalabas sa bansa ang mga opisyal ng pamahalaan na inisyuhan ng precautionary hold departure order (PHDO) matapos masangkot sa maanomalyang flood control projects.
Ayon kay BI Spokesperson Dana Sandoval, binabantayan na rin ng mga LGUs, Philippine Coast Guard (PCG) at Philippine National Police (PNP) ang mga lugar kung saan posibleng dumaan ng iligal ang mga inisyuhan ng PHDO o ang tinatawag na backdoor exit.
Aniya, inaral na rin ng Inter-Agency Council Against Trafficking (IACAT) ng Department of Justice (DOJ) ang mga lugar na karaniwang ginagawang backdoor exit partikular sa Palawan at Tawi-Tawi.
Kung maalala, kahapon nang maglabas si Manila Regional Trial Court Branch 52 Presiding Judge Juan Rañola Jr. ng PHDO kina Senator Jinggoy Estrada, dating Department of Public Works and Highways o DPWH Secretary Manuel Bonoan, dating DPWH undersecretary Roberto Bernardo, DPWH director Gerardo Opulencia at dating Bulacan district engineer Henry Alcantara.
Nag-ugat ang pag-iisyu ng PHDO sa rrklamong isinampa ng National Bureau of Investigation dahil sa sinasabing paglabag ng naturang mga indibidwal sa Republic Act No. 3019 o Anti-Graft and Corrupt Practices Act, plunder, direct bribery, pagtanggap ng regalo at corrupt of public officers.
