Davao City – Nakaalerto ang mga personahe sa Philippine Drug Enforcement Agency XI ug Task Force Davao sa may Barangay Lacson, Calinan, Davao City human nga madawat ang impormasyon gikan sa usa ka concerned citizen nga adunay usa ka indibidwal nga gikatahong mupasulod og droga sa syudad.
Bandang alas 2:45 sa kaadlawon kaganiha atol sa gihimong inspeksyon sa mga operatiba ngadto sa tanang mga pasahero nadakpan ang giingong babayeng drug courier nga giila nga si Papaladun Disamberen, 37 anyos, residente sa Barangay Basak, Malutlut, Marawi City.
Positibong nakuha sa mga awtoridad sa posisyon niini ang 25 gramos nga shabung nagkantidad og P375,000.00.
Sumala sa PDEA nga si Disamberen gikonsiderang big time drug trafficker sa Marawi City ug lakip sa drug personality watch list.
Priso karon sa PDEA XI detention facility ang suspetsado ug kasong may paglapas sa Section 5, Article II sa Republic Act 9165 ang atubangon niini.
Giawhag sa PDEA XI ang publiko nga i-report kanila ang mga nahilambigit sa iligal nga droga pinaagi sa pagtawag og pag-text sa 082-222-3045, 09395433405 o 09331481387.
Samtang, gidayeg ni Task Force Davao Commander Col. Nolasco Mempin sa sunod-sunod nga malampusong operasyon sa mga kasundaluhan sa Calinan checkpoint diin kagahapong adlawa daghang armas, eksplosibo ug mga bala ang nasakmit usab sa mga suspek gikan Magpet, North Cotabato.
“I would like to commend iyong ating personnel doon sa Lacson sa kanilang dedication and commitment sa trabaho in terms of ensuring na maging free from any threat iyong Davao City whether it is from terrorists, criminals or menace ng society natin like iyong illegal drugs,” matud ni Mempin.
RadyoMaN Aimee Guinita
