General Santos City–Malampusong nasikop sa Tropa sa City drug Enforcement Agency (CDEU) ang usa ka makonsiderang big time Drug runner atol sa gihimong buy-bust operation sa usa ka gasolinahan nga nahimutang sa Purok Malipayon, Barangay Labangal, General Santos.
Giila ni Police Sr. Inspector Fernando Manuel Jr. Hepe sa CDEU ang suspek nga si Monjamire Sanggama Ortouste alias Rods, 21, engineering student, residenti sa Bagua II, Barangay Labangal, Gensan.
Alas 11:00 ang takna sa buntag, Miyerkules, August 9, 2017 gihimo ang buy-bust operation batok sa nahisgutang suspek sa may Sea Oil, Purok Malipayon, Barangay Labangal nga miresulta sa pagkasikop sa nahisgutan human kining napalitan ug (1) ka sachet sa gituohang shabu nga mibalor ug P1,000.00.
Nakuhaan usab kini ug lain pang (1) ka Jumbo sachet ug (5) ka sako sa gituohang shabu nga gibana-banaang dunay timbang nga (50-60) Gramo kantidad ug P450,000.00.
Gibutyag ni PSI Fernando Manuel Jr. nga si Ortouste maoy gahatud ug druga ngadto sa duha ka mga bigtime pusher nga ilang nadakpan sa usa ka pension house sa Barangay San Isidro niadtong nakalabayng adlaw.
Gikumperma usab ni Mannuel nga anaa sa drug watchlist sa Police Station 1 ang nasangpit ug dugay na usab nga nalambigit sa iligal nga druga.
Sa kasamtangan ang suspek balhog na sa silda sa Police Station 2 ug ginaandam na karon ang tukmang kaso nga ipasang-at batok kaniya.
