Labangan, Zamboanga del Sur – Patay ang usa ka biker human kining naligsan sa pulis sa National Highway sa Barangay Tawagan Norte, Labangan Zamboanga del Sur alas 9:00 kagahapon sa buntag.
Giila ang biktima nga si Sonnyboy Ramonal, 53-anyos, residente sa Alta Tierra, Tiguma, ning syudad sa Pagadian.
Sa inisyal nga imbestigasyon nasayran nga samtang nagbisikleta ang biktima uban ang mokapin kun kulang (20) ka mga bikers paingon sa dakbayan sa Pagadian gikan sa lungsod sa Labangan, pag-abot sa Barangay Tawagan Norte, Labangan, niining probinsya nagkapingki ang duha ka bisikleta hinungdan nga ang biktima nalabay sa walang bahin sa kalsada ug niilog sa laing lane hinungdan nga naligsan kini sa kasugat nga Isuzu MUX nga nagtangag plate ACB -6879, nga rehistrado ug gimaneho ni PLT JOSEPH MOLINA NOVERO, 47-anyos, PNP member, nga nadestino sa Provincial Mobile Force Company (PMFC), Camp Abelon, Lumbia District, Pagadian City.
Human sa hitabo ang biktima nga si Ramonal nakahiga-agom og seryusong bun-og sa lawas rason nga daling gidala sa Aisha Hospital, apan gideklara kining patay na sa mga doctor.
Ang bisikleta sa biktima gidala na sa grupo sa mga bikers nga gipangaunahan ni Raul Pamaran samtang ang sakyanan nga nakaligis gikustodiya sa Labangan Municipal Police Station samtang ang driver nga pulis anaa sa custodial facility sa naasoy nga police station.
Nangayo og pasaylo sa PLt. Novero, sa pamilya sa biktima.
