Wala sang kaluoy nga ginbalibaran sang mga ospital ang biktima sang vehicular accident sa E. Lopez, Jaro sang nakaligad nga gab-i.
Natabu ang aksidente alas 10 sang Miyerkules sang gab-i matapos mabungguan sang Taxi ang motorsiklo nga ginamaneho sang biktima nga ginkilala kay Nico Porras.
Matapos gin-responderan sang ICER ang lipong nga biktima, gilayon ini nga gindala sa West Visayas State University Medical Center apang ginbalibaran ini nga i-admit bangud wala sang himata.
Bangud sini, gindala sang ICER sa Iloilo Mission hospital ang biktima, apang ginbalibaran naman ini sang nasambit nga ospital bangud wala sila kuno sang ICU.
Masunod nga gindal-an sa biktima ang Iloilo Saint Paul’s hospital apang antis sini, nagtawag anay ang taga-ICER sa Western Visayas Medical Center nga may dal-on sila nga biktima sang vehicular apang wala kuno sang bakante.
Bangud sini, nagderetso sa Saint Pauls ang ICER apang wala man ini ginbaton bangud nagapangayo ang opsital sang down payment nga 8 mil pesos.
Manug-alas 4 na sang kaagahon kahapon sang isa ka doktor sang St. Pauls ang nag-upod agud madala sa biktima sa WVMC kag didto pa lamang ini na-admit.
Masuwerte lang ang biktima kay indi malubha ang naagum sini nga kapilasan bangud kon natabu, posible napatay ini bangud sa pagpasa-pasa sa iya sang mga ospital sa siyudad sang Iloilo.
