BIOMOLECULAR TESTING LABORATORY SA MARAWI CITY, GIBUKSAN NA… OPERASYON NIINI, NAGSUGOD HUMAN SA OPENING CEREMONY PROGRAM

51

Pipila ka minutos human sa launching and opening ceremony kagahapon, midawat og kapin napulo ka mga specimen sample ang bag-ong gibuksan nga biomolecular testing laboratory sa Marawi City.

  Kini aron i-test didto na mismo sa testing laboratory nga anaa nahimutang sulod sa Amai Pakpak Medical Center (APMC) sa Marawi City ug dili na dad-on ngadto sa Cagayan de Oro City nga maoy naandan sukad pagsugod sa pandemya niadtong bulan sa Marso.  
Matud pa ni Dr. Shalimar Rakiin, ang chief of hospital sa APMC, imbes nga mohulat og upat ngadto na sa lima ka adlaw ang usa ka tawo nga gisuspetsahang adunay COVID-19, 48 oras nalang ang gidugayon sa paghulat karon nga nabuksan na ang testing laboratory sa Marawi.  
Bana-bana nga moabot sa 96 ka mga specimen ang mamahimong i-test sa makina sulod sa usa’g tunga ngadto na sa duha ka oras ug hangtud walo ka oras ang mamahimong operasyon sa laboratoryo.  
Una nang miingon si Department of Health Regional Director Adriano Subaan nga dili eksklusibo sa Marawi City ug Lanao del Sur ang maong testing laboratory tungod kay mamahimo man usab nga magpa-analyze didto ang mga sikbit nga local government unit (LGU).  
Niadtong Agosto 21 pa unta ang gitakdang pagbukas niini, apan tungod sa mga kakulian nga dili malikayan, tulo ka bulan kining  na-delatar.  
Mokabat sa halos 28 milyones pesos ang gigasto alang sa katukuran sa maong laboratory: 18 milyones pesos ang gasto sa construction sa tibook kwarto nga mi-okupar sa tibook basement sa daang building sa APMC samtang 10 milyones pesos ang gasto sa pagpalit sa mga makina niini.  
Mihatag og diyes milyones pesos (P10 M) ang probinsiyal nga kagamhanan sa Lanao del Sur ug dos milyones pesos (P2 M) ang gihatag sa kagamhanang lokal sa Marawi City nga gikan sa ilang Bayanihan Grant Funds.  
Ang rehiyonal nga pang-gobyerno sa Bangsamoro maoy mihatag sa kapin 15 milyones pesos alang sa gipalita sa mga makina. (DIVINA SUSON)


Facebook Comments