TACLOBAN CITY – Nagpahinumdom an Bureau of Internal Revenue (BIR) Region 8 ha mga tax payers ha bug-os nga Eastern Visayas nga mag-file ngan magbayad hin sakto nga Income Tax Return ugsa pa man an deadline yana nga tikaarabot Abril 16, 2018 adlaw hiton Lunes.
Sumala kan Ma. Gracia Javier, Regional Director han BIR Region 8, dapat siguraduhon han mga tax payers nga makabayad han income tax ugsa pa man dealine.
Pahinumdom han BIR nga kun diri makabayad an mga tax payer ha sakob han ginhatag nga talaan nga adlaw in mag-aatubang hin penalidad. Ha ilarom ha implementing rules and regulations han BIR, babayaran han tax payer an 25% han tax amount due ngan 20% nga interest per annum ngan mayda pa kadugangan nga penalty amount.
Yana nga tuig, P9.5 billion target han BIR nga makokokekta ha mga nagbabayad hin buwis ha bug-os nga Eastern Visayas.
Agud masiguro han BIR nga an tanan nga mga nagne-negosyo in nagbabayad hin sakto nga buwis, padayon naman an pagdumara han BIR Post Evaluation ha mga point of sale machine nga gingagamit han mga tax payers agud masabtan kun hira ba in nagsusunod ha legislation ngan implementation requirement han BIR.
