ILOILO – Ginconfirmar ni 4th District Congressman Ferjenel ‘Ferj’ Biron nga interesado siya nga magpadalagan bilang Gobernador sa 2019 Elections. Sa interview sang RMN Iloilo kay Biron, gindetalye niya ang mga hitabo sa ila meeting ni Governor Arthur Defensor kaupod ang 4 ka mga Kongresista sa Iloilo. Nahibaluan nga interesado man si 3rd District Congressman Toto Defensor nga magpapili bilang gobernador sa masunod nga eleksyon. Ini ang rason kon nga-a nagtipon sanday Governor Arthur Defensor Sr., kaupod kanday Congressman Arcadio Gorriceta sang 2nd District, Toto Defensor sang 3rd District, Ferj Biron sang 4th District, kag Boboy Tupas sang 5th District. Ginpahayag ni Govenor Defensor nga indi pwede nga ang apat ka congressman lang ang magadesisyon kon sin-o kanday Biron kag Defensor ang magapapili bilang gobernador sa 2019. Suno kay Defensor kuhaon ang consensus sang mga Mayor sa probinsya kon sin-o ang ila pilion kag handa man si Biron nga sundon kon ano man ang consensus sang mga alkalde. Wala naman ginpahayag ni Biron kon bala, siya ukon si Toto Defensor ang ginpili sang mga alkalde. Nahibaluan nga sa pagsinapol sang mga Congresman sa Iloilo, wala gin-imbitar si Congressman Richard Garin sang 1st District.
