President Roxas, Capiz – Padayon ang pagkolekta sang mga impormasyon sang kapulisan sa nagluntad nga shooting incident sa Poblacion Swa, President Roxas kun sa diin ginkamatay sang 20-anyos nga biktima kag ginkapilas sang pakaduha sini.
Ginkilala ang biktima kay Roger Bayes y Villanueva sang Brgy. Quiajo, President Roxas, Capiz nga gindeklarar nga dead on arrival sa Bailan District Hospital matapos nag-angkon sang patal nga igo sang bala sa ulo. Nakaagum man sang igo sa paa si Mandy Magsipoc, 21-anyos sang nasambit man nga lugar pakaduha ni Bayes.
Ginpahayag ni Police Inspector Jerome Manahan, hepe sang President Roxas PNP nga alas 10:45 sang gab-i sang nagluntad ang insidente samtang naga-inum ang biktima sa poluy-an sang pakaduha nga si Mandy Magsipoc nga nagaselebrar sang iya kaadlawan.
Base sa imbestigasyon sang mga kapulisan, nag-ugat ang tanan sang ginkakas ni JERRY Boy BORLEO (utod sang suspek) ang cord sang videoke machine nga amo ang gintunaan sang indi paghangpanay sang mga ini tubtob nga nagtapungulay. Nagpauli si Jerry, kag pagbalik sang ini kaupod na niya ang utod nga may dala nga armas luthang kun sa diin hinali sini nga ginpangluthang ang mga biktima.
Padayon pa nga ginapangita sang mga katapo sang Pres. Roxas PNP ang suspek nga si JOHN MARK BORLEO Y UGAS, 27-anyos samtang nakarekober naman sang mga empty shell sang .45 caliber pistol sa lugar nga ginluntaran sang insidente
