![](https://i0.wp.com/rmn.ph/wp-content/uploads/2019/05/IMG_20190530_131312.jpg?resize=696%2C696&ssl=1)
Bisan paman sa iyang kakabus, wala magduha-duha sa pagdangop sa DYHP ang usa ka senior citizen nga tinder og buwad aron i-turn over ang dul-an sa 30 mil pesos nga kwarta nga iyang nakit-an.
Si Avelino Diaz nga taga Brgy. Sawang Calero dakbayan sa Sugbo, nisaysay nga mga alas 8:00 sa buntag kagahapon nakakita siya og pitaka sa karsada duol sa San Nicolas Parish, ug iya kining gipunit.
Sa iyang pag-abli sa pitaka nakita niya ang daghang kwarta ug sa dihang iyang gi-ihap niabot kini og P 26,500.
Adunay ATM card ang sulod sa pitaka hinungdan nga ang ATM card giturn-over ni Diaz ngadto sa bangko.
Giangkon ni Diaz nga kagabii naglisud siya sa pagkatulog tungod kay wala pa niya mauli ang maong pitaka nga adunay kwarta.
Ang pitaka adunay mga identification card nga iya ni Kenneth Paul Albotra.
Karong udto giturn-over ni Diaz ang pitaka uban ang kapin sa 26 mil pesos nga kwarta sa DYHP ug sa dihang nakita ang I.D. nahibaw-an na nga iya ni Police Major Kenneth Paul Albotra, ang hepe sa San Nicolas Police Station.
Daling gitawgan sa DYHP si Major Albotra aron makabisita sa DYHP ug mahimamat si Diaz ug aron usab mabalik kaniya ang kwarta.
Atol sa interview sa DYHP, matud sa senior citizen nga bisan paman sa iyang kalisud sa kinabuhi dili mahimutang ang iyang konsensya nga maghupot sa maong salapi nga posibling gamitunon usab kaayo sa tag-iya.
Sa iyang bahin dako og pasalamat ni Major Albotra sa kamatinud-anon ni Diaz ug gitataw niini nga aduna gyud gihapoy mga tawo nga matinund-anon ug angayan lang nga panaminan ug magsilbing ehemplo sa publiko.
Nasayran nga ang maong kantidad midyear bunos diay ni Albotra sa PNP.
Agig pasalamat si Diaz gihatagan og pahalipay ni Major Albotra, nga dili pa gani unta dawaton sa senior citizen ,apan kinasingkasing nga gitunol sa police officer ngadto kang Diaz ang maong pahalipay.