Davao City – Gibutyag sa kadumalahan sa Davao City Overland Transport Terminal (DCOTT) nga adunay pagkunhod sa ihap sa biyahe sa terminal bisan og padulong na ang holiday season.
Sa interbyu sa DXDC RMN Davao kang Aiza Usop, DCOTT Manager, gibutyag niini nga subay sa ilang datos, anaa lamang sa kapin 240 bus trips ang matala matag adlaw.
Ang maong ihap layo kun itandi sa datos sa milabay nga katuigan nga muabot sa 1,500 ngadto sa 1,600 ka biyahe ang matala matag adlaw panahon sa Disyembre.
“If we are going to compare last year (ang biyahe), grabe gyud nato ka-busy karong mga panahona but sad to say nga mingaw gyud gihapon ‘ta karon despite nga Disyembre na gyud ‘ta,” butyag ni Usop.
Matud ni Usop mas ubos gihapon ang kapin 240 bus trips kun itandi sa normal nga adlaw niadto’ng wala pay Coronavirus Disease 2019 (COVID-19) pandemic nga anaa sa 650 hangtud na sa 800 ka biyahe.
Dugang sa DCOTT Manager nga padayon gihapon nga ginapatuman ang health and safety protocols batok COVID-19 panahon sa biyahe sama sa pagsuot og face mask, face shield, social distancing ug ang pag-require na karon og QR (Quick Response) Code ayha makasulod sa terminal.
RadyoMaN Kirby Manzon
