Davao City – Giimbestigahan sa Bureau of Jail and Management Penology (BJMP) XI ang ka-transact nga Persons Deprived of Liberty (PDLs) sa nadakpang bisita nga nagdala sa kantidad sa P254,000 nga shabu nga gisok-sok sa mga sud-an nga adobo ug humba.
Segun ni Jail Inspector Edo Lobenia, BJMP XI spokesperson, ginasubay nila kung kinsa kini nga mga PDLs sa sulod sa Davao City Jail ang mudawat unta sa maong illegal nga droga.
Nakasuhan na og paglapas sa RA 9165 ang suspetsadong si Richard Caybot, 40 anyos ug residente sa Calinan ning syudad.
Subay niini, gipatuman ni JSupt Peter Bongngat Jr., Warden sa Davao City Jail – Male Dormitory ang mas striktong protocols sa pag-search sa tanang ipangsulod sa mga prisuhan sa rehiyon aron walay makalusot nga mga kontrabando.
Subay niini, gibutyag ni Lobenia nga gipakusgan sa BJMP XI ang mga operasyon sulod sa City Jail diin daghang mga bladed weapons ug cellular phones ang nasakmit.
Hugot usab nga gibantayang walay makalusot nga mga cellular phones sa jail facility aron walay transaksyon nga mahitabo sa mga PDLs ug sa ilahang mga koneksyon sa gawas.
RadyoMaN Aimee Guinita
