*SAGAY CITY, NEGROS OCCIDENTAL* – Ginpaidalom na sa paraffin test ang ginatudlo suspek nga isa ka block time radio anchor sa natabo nga shooting incident kon diin dead-on-arrival sa ospital ang biktima nga iya man lamang kaugalingon nga asawa.
Ginpahayag ni Sagay City PNP OIC Chief Police C/insp. Eduardo Corpuz nga base sa resulta sang ila initial investigation luyag pagwaon sang ginatudlo suspek nga si Mhodee Andalina, 38 anyos ang edad nga aksidente ang pagkatiro patay sa iya asawa nga si Virginia Andalina, 33 anyos ang edad.
Apang sa ulihi, lain naman ang iya nga version matapos nga iya naman ginsiling nga sila ang gin-ambush.
Natabo ang insidente pasado las 11 Miyerkules sang gab-i samtang nga ini sila nagasakay sa tricycle nga ginapanag-iyahan mismo ni Mhodee, upod ang iya asawa kag apat ka iban pa gikan sa Hda. Martinez, Brgy. Poblacion 2, Sagay City padulong kon tani sa City Public Plaza.
Suno kay Corpuz nga mga la una na kaina sang kaagahon nga na report ni Mhodee ang insidente kon diin una ginsiling nga nakabati siya sang lupok kag nakibot na lamang sila sang nakita nga naga uy-uy na ang biktima.
Sa pag-imbestigar sang police nakita nila nga bukas ang bag ni Andalina kag may armas ini nga Magnum 22 nga nag match naman sa empty shell nga na recover sa scene of the crime.
Patal nga igo sa likod ang naagom sang iya asawa nga amu naman ang tunaan sang gilayon kamatayon sini matapos ang insedente. /*dyHB BACOLOD*
