Patay ang usa ka blocktimer sa Dumaguete City human gipusil sa riding in tandem kagahapon sa buntag.
Sa pakighinabi sa RMN DXCC ni Radyoman Anthony Maguinsay sa RMN Dumaguete, naila ang biktima nga si Dindo Generoso, 67 anyos, taga Barangay Banilad Dumaguete, usa ka businessman.
Sa imbestigasyon sa kapolisan, padulong ang biktima sa usa ka estayunan sa radyo dihang gipusil kini sa mga suspek nga sakay sa usa ka motorsiklo.
Samtang usa sa gilantaw nga motibo karon sa kapolisan sa Dumaguete ang anggulo sa politika.
Kini human nasayran nga ang biktima nga si Generoso, midagan pagka Mayor sa milabay nga eleksiyon apan napildi.
Gawas niini, gitun-an sa kapolisan ang programa niini sa radyo, samtang padayon usab nga nangita og mga witnesses atol sa hitabo.
