Gipasibaw karon sa hawanan sa konseho sa probinsiya ni Board Member Ronilio D. Lee isip Chairman sa Committee on Natural Resources, Environmental Protection and Development sa Sangguniang Panlalawigan sa Zamboanga del Norte ang privilege speech sa matud pa, dili makiangayon nga hitabo ug buot mangayo sa husay ug katubagan ang mga konsumante sa kooperatiba ngadto na sa mga namunoan sa Zamboanga del Norte Electric Cooperative (ZANECO), Incorporated kabahin na sa kalit nga pag-uktaba sa gikalatid na unta nga elections alang sa Board of Director (BOD) sa District V kaniadtong Sabado, Pebrero 24, 2018 nga gikatakda unta nga ipahigayon sa Estaka Elementary School ning dakbayan sa Dipolog.
Diha sa pagbarug ni Lee sa sangguniang panlalawigan session, iyang gipalanog ang kabalaka ug kahigwaos sa nahitabo nga pag-uktaba sa maong election alang sa posisyon nga Board of Director sa District V sa ZANECO nga nagalangkub sa siyam (9) ka barangays nga mao ang mosunod: Gulayon, Lugdungan, Turno, Estaka, Biasong, Barra, Minaog, Dicayas ug Sicayab nga giila nga Dipolog City North.
Matud pa ni Lee nga andam na unta ang mga magtutudlo sa pito (7) ka presinto sa Estaka Elementary School diin ipahigayon ang maong election kaniadtong Pebrero 24, 2018 sa may alas 8:00 ang takna sa kabuntagon apan iyang gikatingila ngano nga wala man nahiabot ang mga empleyado sa ZANECO ilabi na ang mga balota ug ballot boxes alang sa maong election.
Lakip nga buot ipatubag ni Board Member Lee ang punto sa pag-uktaba sa piniliay sa Board of Director sa District V pinaagi sa gipagawas nga order gikan sa District Election Committee (DECOM) ug gitunol ngadto sa mga sakop sa Precinct Election Committees (PECOs) alang sa maong kamanduan nga gipatuman atol mismo sa adlaw nga pagahimoon na unta ang piniliay nga wala sukad mahitabo.
Dugang pa ni Lee nga si Raul Tangcalagan kinsa maoy kandidato nga BOD sa District V ang nakadawat na sa decision gikan sa National Electrification Administration (NEA) nga nagatugot niya (Tangcalagan) nga modagan sa maong posisyon nianang bisperas sa election pa daan pinetsahan ug Pebrero 23, 2018.
Tungod sa maong kontrobersiya, gipasupot ni Board Member Ronilio D. Lee ang resolusyon nga nagtinguha sa pagpatawag sa Chairman ug Members sa Committee on Election ug ingon man Chairman ug Members sa Screening Committee sa ZANECO atubangan sa mga sakop sa sangguniang panlalawigan isip Committee of the Whole karong adlawa Huwebes, Marso 8, 2018 sa may alas 2:00 ang takna sa hapon didto gihapon sa SP Session Hall ning dakbayan sa Dipolog aron makahatag ug tukma nga kasayuran ngano nga nahitabo kini.
