TACLOBAN CITY – Nahikalasan an mga nagrerenta ha usa nga boarding house ha Brgy. 34 Juan Luna St. Tacloban City matapos nga lumirab hin kalayo an ira ginsasak-an alas 6:20 han aga kasangkulop.
Dayon naman nga ginpatay an kalayo han mga umabot nga bombero han Bureau of Fire Protection (BFP) han Tacloban pero baga na hin kalansay an 2nd floor han mao nga boarding house.
Gintutuuhan han mga nangungukoy han mao nga panimalay nga electric fan nga nag-overheat an hinungdan han sunog.
Pero ha nagawas nga imbistigasyon han BFP, faulty electrical wiring nga nagtikang ha 2nd floor an hinungdan o rason han sunog.
Ha interview han RMN kan F/Insp. Dindo Daguman, Regional Chief for Operations han BFP, posible nga nag-overload hin gingagamit nga appliances an mao nga boarding house rason han faulty electrical wiring.
“Bangin nag-overload hira kay an capacity gud han usa nga balay in nadepende la han load nga required han usa nga balay. Kun magdudugang hin mga electrical appliance ngan magsobra na hin load nga dapat nga required, amu ito nga nagkakamayada na kita overload, nagkakamayada na kita defect han connection ngan dida na magtitikang an sunog.”
Kikitaon naman yana han BFP kun nag-sunod ba ha fire safety rules and regulations an mao nga boarding house.
Dugang ni Daguman, kada-tuig an ira pag-inspection han mga boarding house ha Tacloban pero an problema bangin waray ini business permit ha Tacloban City Hall amu nga waray nira ini kapanginanua.
P50,000.00 an penalidad para hadton diri nagsusunod han mga requirements han BFP sugad han fire extinguisher ngan fire exit.
Samtang, P350,000.00 an kantidad han damage han nasunog nga boarding house.
