Dumalag, Capiz – Ginabanta nga nagalab-ot sa P500, 000.00 ang gin tuga nga kahalitan sa pagsunog sa bodega sang poultry farm nga ginapanag-iyahan ni 2nd district Congressman Fredinel Castro nga nahamtang sa Barangay San Agustin, Dumalag, Capiz.
Ginpahayag sang hepe nga si Police Captain Leomindo Tayupon sang Dumalag MPS base sa panaysayon sang caretaker sang amo nga poultry nga ginabanta yara sa kinse (15) ka mga armado nga persona ang nagsulod sa poultry farm kag gindis-armahan ang guardiya.
Ginpangtipon ang mga trabahante sa isa ka lugar antes nga ginsunog ang bodega nga ginabutangan sang mga feeds kag iban pa nga mga kagamitan.
Suno kay Tayupon, una nga nagsulod ang duha ka babaye nga persona kun sa diin nagsunod man ang walo ka iban pa samtang ang kaupdanan sang mga ini ang nagpabilin sa palibot.
Suno sa mga ini, nakabaton sila sang mga reklamo sa mga residente angut sa ginatuga nga kabaho kag presensya sang mga langaw bangud sa pag-operate sang amo nga poultry farm. Tuman man ka nubo ang pagpasuweldo sa mga trabahante.
Sa subong, ginahibalo pa kun anu nga grupo ang responsable sa amo nga insidente sang pagpangsunog sa bodega sang poultry farm ni Congressman Fredinel Castro.
