Body parts nga na-retrieve sa Masara landslide, gipailawom na sa DNA testing

Davao City – Anaa na karon sa proseso o sa deoxyribonucleic acid (DNA) testing ang mga unidentified nga patay’ng lawas o body parts nga na-retrieve sa landslide sa Barangay Masara, Maco, Davao de Oro.

Sa radio interview kang Davao de Oro 2nd District Representative Ruwel Peter Gonzaga nga gipagawas sa Provincial Government of Davao de Oro Facebook page, iyahang gibutyag nga giproseso na sa National Bureau of Investigation (NBI) ang mga sample gikan sa mga kabanay nga nawad-an og miyembro sa pamilya ug anaa na karon sa kaulohan.

Matud ni Gonzaga nga sa pagkakaron, adunay walo ka indibidwal ang natalang missing human nga giundang ang search and retrieval operation niadtong Pebrero 22, 2024, subay sa termination order nga nakabase sa Executive Order (EO) No. 17.

“Pag-uli ana, mo-match na gani, mailhan, i-deduct ‘to sa mga missing (individual). Sa laktud pagkasulti, makuhaan pa na’ng walo nga naa sa missing nga pangalan,” matud ni Gonzaga.

Dugang sa opisyal nga posibleng madugay-dugayan ang proseso apan ilang gipanghinaut nga maila sa pamilya ug mapahilona ang ilang mahal sa kinabuhi.

RadyoMaN Kirby Manzon