ESCALANTE CITY – Padayon pa ang imbestigasyon sang mga kapulisan kon ano ang motibo sang kamatayon sang 62 anyos nga retired police, sa Sitio Cagay, Barangay Buenavista, Escalante City Negros Occidental.
Suno kay P/Chief Insp. Rolly Pondevilla , hepe sang Escalante City Police Station, ang biktima ang ginkilala kay SPO2 Anghel ‘Boy’ Sinadhan, nga nasapwan pasado alas 7:40 Sabado sang aga, nga may igo sang bala sa tuo nga bahin sang iya mata nga naglapus sa likod sang iya nga ulo.
Nagahamyangon nga wala na sang kabuhi sa sulod sang iya nga kuarto kag nadula pa ang iya mga pagkabutang sa sulod kag ang armas.
Si Sinadhan ang nagaserbe bodyguard ni 1st District Congressman Melecio ‘Beboy’ Yap sa diin mga las 11 sang Biyernes sang gab-i sila nagbulagay sa Barangay Balintawak.
May nabakal ini nga lote sa iya pagretiro sa pagkapulis sa maligwin nga lugar sa Barangay Buenavista nga iya naman ginpatindugan sang balay.
