Gin- ako ni Iloilo City Urban Poor Affairs Office Head Mr. Roy Fermiza nga boluntary siya nga nag-resign bilang hepe sang gina-uyatan nga talatapan matapos nga gin-istorya sila ni Mr Jojo Castro ang ginasaligan nga tawo ni Mayor Joe Espinosa III sa isa ka Loyalty Check meeting kahapon.
Suno kay Fermiza ginkasubo niya ang natabo, bangud mga tatlo na ka dekada nga nangin kaupod niya sanday Congressman Jerry Treñas kag Mayor Joe Espinosa III. Kaupod sang ICUPAO chief nga nagdesisyun sa pag-resign sanday Executive Assistants Rudiver Junco, Melchor Tan, Boyet Rico kag Mitch Antiquenia, samtang una na nga nagpahayag nga mag-resign si former Punong Barangay Irene Ong bangud sa plano sini nga magpadalagan liwat bilang kapitan sa barangay.
Nahibalu-an nga ang grupo nanday Fermiza ang kilala nga mga tawo ni Congressman Jerry Treñas humalin pa sang siya ang alkalde sang syudad.
Sa pihak sini ginpahayag ni Fermiza nga naghinyo siya nga magtinir tubtob sa petsa 15 sang Marso subong nga tuig para maplastar ang pormal nga pag-turn over sang mga dokumentu sa magabulos sa iya.
Ang pagkakas sa mga Treñas boys sa city ang kasunod sang deklarasyon sang kongresista nga magpadalagan bilang alkalde sang syudad.
