Ginkanselar ang klase sa Ateneo de Iloilo sa Mandurriao bangud sang bomb threat kahapon sang aga.
Ginpapuli ang mga estudyante kag ginsiraduhan ang mga karsada sa palibot sang lugar matapos nasapwan ang plastic nga may unod nga cellphone, may wirings kag napalibutan sang electrical tape sa gate 2 sang eskwelahan.
Gilayon naman nga nagresponde ang Explosives and Ordnance Division (EOD) agud i-clear ang area.
Suno kay Police Insp. Reman Benobo, deputy team leader sang EOD -k9 sang PRO- 6, hoax ukon indi matuod ang ginaalegar improvised explosive device bangud wala ini sang pulbura sang ila gingamitan sang water disruptor.
Suno naman kay Mr. John Trompeta, Prefect of discipline sang Ateneo de Iloilo, mas nangin hugot ang ila seguridad matapos ang pamahog nga nabaton sadtong Setyembre 9 gani wala sila sang ideya kon paano nakasulod ang ginaalegar IED sa eskwelahan .
Padayon ang imbestigasyon sang kapulisan agud matul-id kon sin-o ang sa likod sang insidente bangud wala sang CCTV camera sa area kon sa diin ginbilin ang ginaalegar IED.
