Davao City – Nagpakita og suporta ang usa sa mga kapitan dinhi sa syudad sa Davao ngadto kang Special Assistant to the President Christopher ‘Bong’ Go kabahin sa mga hungingong karon nga mudagan kini pagkasenador sa 2019 elections.
Sa pakighinabi sa DXDC RMN Davao kang Brgy. Captain Remegio Licera sa Brgy. Lizada, Toril ning syudad diin sa iyang tan-aw nga mamahimong epektibo nga pagka Senador si Bong Go.
“Sa akoang tan-aw kun ugaling man, epektibo siya nga pagka Senador tungod karon pa gani nga di pa siya senador, effective naman siya sa iyang trabahao ilabi na sa pagtabang kang presidente Duterte”, sigun ni Licera.
Dugang niya nga og mudagan man sa nasangpit nga posisyon si Bong Go, dili mawala ang ilang suporta sama sa pagsuporta nila kang pangulong Rodrigo Duterte.
Sa bahin ni Sec. Go, nakadepende matud pa kang presidente og mudagan siya sa senado sa tuig 2019.
Gani dugang niya nga sayo pa aron hisgutan ang eleksyon diin sa karon nakatutok siya sa pagtuman sa mga saad sa pangulo ngadto sa katawhan.
Hinuon gikalipay ni Bong Go ang suporta sa mga miyembro sa gabinete nga nagatulak karon sa iyaha nga mudagan pagkasenador.
RadyoMaN Renz Barbarona
