Nanguna si dating Senator Ferdinand “Bongbong” Marcos Jr. sa survey ng Social Weather Stations (SWS) para sa pagkapangulo sa 2022 election.
Ito ay matapos makakuha si Marcos ng 47% para maungusan si Vice President Leni Robredo na may 18%; Manila Mayor Francisco “Isko Moreno” Domagoso (13%), Senator Manny Pacquiao (9%) at sina Senator Panfilo “Ping” Lacson at Senator Ronald “Bato” dela Rosa na pawang nakakuha ng 5%.
3% naman sa mga sumagot ay wala pang napipili kung sino ang kanilang iboboto para sa eleksiyon.
Samantala, para naman sa pagkabise-presidente, nanguna si Senator Vicente “Tito” Sotto III na may 44%, sinundan nina; Davao City Mayor Sara Duterte (25%); Senator Francis “Kiko” Pangilinan at physician Willie Ong na pawang may 13% at BUHAY Partylist Rep. Lito Atienza na nakakuha ng 3%.
Sa pagkasenador naman, nanguna ang Broadcast journalist Raffy Tulfo para sa preferred senatorial candidate na nakakuha ng 60%; sinundan nina Sorsogon Gov. Francis Escudero (51%) at Taguig-Pateros 1st District Rep. Alan Peter Cayetano na nakakuha ng 50%.
Isinagawa ang survey nitong October 20 hanggang 23 kung saan aabot sa 1,200 respondents ang lumahok.
