ILOILO – Dapat siraduhan sa sulod sang duha ka bulan tubtub isa ka tuig ang isla sang boracay kag indi anay pagpasudlan sang mga turista.
Ini ang ginpahayag ni DENR 6 Director Jim Sampulna kon siya lang ang pasugtan agud ma-restore ang katahum kag katinlo sang nasambit nga isla.
“Nagadugo ang akon tagipusuon nga makita ang sitwasyon sang boracay,” ang pahayag ni Sampulna.
Suno kay Sampulna nga kon hatagan siya sang poder, luyag niya nga siraduhan anay ang isla sa mga turista agud mahatagan sang nagakaigo nga panahon agud masolbar ang environmental problem sa Boracay.
Pahayag ni Sampulna, daw indi na tourist site ang boracay kundi daw market place ukon tindahan.
Dugang pa diri ang madamo nga basura kag mga kanal nga indi lang tubig ulan kag tubig dagat ang naga-ilig kundi pati na ang tubig halin sa mga kasilyas.
Una diri, ginpahayag ni Sampulna nga posible madula na ang boracay sa listahan bilang number 1 tourist destination sa bilog nga kalibutan kon lubos ini nga maguba bangud sa sobra-sobra nga pag-abuso sang mga tawo.
