Davao City – Sa usa ka demokratikong nasud sama sa nasud-Pilipinas, ang pag botar dili usa ka pribelehiyo, kon dili, usa ka katungod.
Katungod nga mupili og lideres nga mamahimong representante ug mangulo alang sa kalamboan sa nasud nga atong gipuy-an ilabi na diha sa lebel sa kabarangayan diin kita nanimuyo.
Apan alang sa kabatan-onan, dili lamang kini katungod apan usa usab ka dakong responsibilidad gumikan sila man unya ang muhulip sa dagkong posisyon pag-abot sa panahon pinaagi sa Sangguniang Kabataan kun SK.
Gani sa subling pagbanhaw sa kontrobersiyal nga Sangguniang Kabataan, lima ka tuig na ang milabay, daghan ang gustong mupapili isip SK Chairman ug SK Kagawad aron mangulo sa mga lihok diha sa tagsa-tagsa nilang kabarangayan
Willing. Committed. Passionate. Kini mao ang mga kwalipikasyon nga ginapangita sa usa ka first time SK voter sama ni Rogie Ann Lizada, 19 anyos, estudyante, ug residente sa Calinan ning syudad sa Davao.
“Akoang expectation sa mga aspiring leaders sa atong katilingban is prepared sila kung unsa man ang mahitabo or unsa man na projects na ilang buhaton. (cut) Tapos isa pod is wala sila nidagan tungod kay gusto nila makumpleto ang line up na giinvite sa ila kundi nidagan sila tungod kay gusto sila makatabang sa komunidad,” segun niini.
Isip botante, nasayod usab ni si Rogie Ann sa mga isyu bahin sa Sangguniang Kabataan.
“Kanang gina pangwartahan lang daw ang SK. (cut) Common nila na project is pa-liga, pageant. Para sa akoa, dati ang mga nanagan sa SK is 15-18, dili sa pagdegrade, pero unsa man ang alam kayo sa 15-year-old bahin sa mahimong leader sa community,” saysay niini.
Gani giuyonan usab ni Rogie Ann ang mandatory training alang sa mga mamumuno sa SK:
“Maayo kay dili tanan nidagan nag SK naka attend na og seminars or training. Kung katong nidagan naka try na og training, mas pabor sa iyaha kay madungagan iyang learning so katong sa mga wala mas maayo pod para ma-enhance ilang capability ug naa silay knowledge about sa SK na ilang gidaganan,butyag niini.
Gumikan sa gibarugan ni Rogie Ann nga positibo ang epekto sa political dynasty, gipangandoy niini ang usa ka lider kinsa maoy makatunol og dakong contribusyon ug kinsa maka engganyo usab sa kabatan-onan nga mamahimong produktibo alang sa pag-establisar sa usa ka progresibong komunidad.
Hagit sa first-time SK voter ngadto sa mga mukandidato isip SK Chairman ug SK Kagawad sa ilang kabarangayan mao kining mosunod nga mga pulong:
“Be true to yourself. Dili lang sa pagpangampanya naga storya mog kini buhaton nako bale dili lang diha kutob inyong giingon ug gi promise sa mga kabatan-onan kundi buhaton ninyo kung madaog namo. Di kay kung mapildi mo,di na ninyo suportahan ang modaug.”
Aduna usab siyay hagit ngadto sa susama niyang fist time SK voter, atong paminawon:
“Botohon nato tong karapat-dapat, kinsa tong magsilbing maayong ehemplo sa kabatan-onan ug as a leader dapat kabalo ka musabot sa mga tao ug dapat maminaw pod ka sa imong subordinates kung unsa ang ilang masuggest about sa imohang i-implement na project.”
Sa panahon karon nga uso ang walay kasigurohan ug way bili nga mga saad, atong botohon ang kandidatong adunay lig-ong pagtratar sa interes sa youth segment, kadtong adunay igdulungog nga maminaw sa mga mulo sa iyang sektor ug may igong katakos nga mopasibaw sa tingog nga iyang girepresentahan.
Sama ni Rogie Ann, isip representante sa mga first time SK voters, naglaum usab ang ubang kabatan-onan og undanong pagbag-o sa dagan sa pamulitika nga inay gamiton kini sa pagpangwarta, himoon kining plataporma aron sila malikay sa iligal nga buhat ug makahatag og positibong paagi ngadto sa pagkab-ot sa matuod nga kalamboan.
RadyoMaN Jason Amisola
