Davao City – Madayon karong adlawa ang pag demolish sa mga kabalayan alas 8:00 karong buntag sa Brgy 26-C Salmonan ning syudad sa Davao.
Kini maoy gipamahayag ni DCPO spokesperson Police Senior Inspector Ma. Teresita Gaspan diin adunay lock down nga nahitabo sa too nga bahin sa dalang Boulevard.
Sa pagpanubay sa DXDC News Team, plastado na ang mga miyembro sa demolisyon team gani aron ipaneguro nga luwas ug dili mabutang sa delikado ang maong grupo, anaa ang pwersa sa kapulisan sa DCPO isip depensa kung galing adunay di maayong buhaton isip balos ang mga residente sa maong lugar.
Dugang niini, gibutyag ni Gaspan nga dili sila segurado kung adunay myembro sa Kadamay ang anaa sa sulod demolition site.
Sumala niini, tumong niini nga mapatuman og malinawon ang demolition order nga gipagula sa korte, gani gimanduan ang mga sibiliyan lakip ang media nga dili usa moduol sa demolisyon site.
Sa pakighinabi sa DXDC news team sa mga residente, nihangyo sila nga pataposon usa ang Ramadan ayha silang boluntaryong muhawa sa maong lugar.
Apan nasayran nga wala gidawat sa mga residente ang gitanyag nga relokasyon sa lokal nga kagamhanan diin mao karoy sutaon sa DXDC News team.
Kahinumdoman nga nimando ang korte og demolisyon pabor kang Datu Bahajin Marcos Mahafali nga maoy niangkon sa luna nga iyang napalit niadtong tuig 2011.
RadyoMaN Jason Amisola
