Davao City – Detinado karon sa selda sa kapolisan sa Investigation and Detective Management Branch sa Davao City Police Office (DCPO) ang drayber sa Metro Shuttle Bus sa nahitabong bangga sa Boulevard, Davao City diin kini mag-atubang og kaso.
Kini human matud pa gisugat sa usa ka pribado nga Mazda Sedan ang iyang gimanehoan nga bus hinungdan nga on the spot patay ang drayber nga si Melody Ann Ybañez, 27 anyos, ug ang angkas nga si Janilou Rosales, 21 anyos, nahitabo niadtong adlaw’ng Biyernes sa kaadlawon.
Sa gihimong pakighinabi sa DXDC RMN Davao kang Ricky Deloso ang bus driver sumala pa niya nga kini ang unang higayon nga nakasinati siya og bangga sa kadalanan sa 20 ka tuig na niya nga pagmaneho.
Matud ni Deloso nga iyang gipaabot ang pagpangayo og pasaylo ngadto sa pamilya sa namatyan ug wala kini gituyo nga mahitabo.
Sa maong insidente, gipahinumdoman ni Deloso ang iyang mga kaubanang drayber nga magbantay sa pagbiyahe ug mag-ampo kanunay sa Ginoo aron malikay sa disgrasya sa kadalanan.
RadyoMaN Don Pulayao
