Davao City – Positibo ang usa ka boxing coach nga kaya ra nga mapildi ni Manny Paquiao si Yordenis Ugas sa Agosto 22, 2021(Manila time) sa ilang away sa Las Vegas, USA alang sa WBA Welterweight title.
Sa interbyu sa DXDC RMN Davao kang Coach Rey Lariosa sa Amature Boxing Association of the Philippines (ABAP) Davao City Chapter, gisaysay niini nga luyo sa pagbag-o sa iyang makalaban human ni-back out si Errol Spence Jr. tungod sa injury, kaya ra nga ma-adjust ni Pacquiao sa iyang training unsaon niya nga mapildi si Ugas.
Sumala ni Lariosa nga dili angay kabalak-an ang abilidad ni Ugas tungod kay aduna pay mga mas kuyaw pa kang Ugas nga nakalaban ug napildi sa fighting senator.
“Para sa akoa lang, sa tan-aw nako, dili kaayo na delikado kang Manny Pacquiao (si Ugas). Dili kaayo siya ingon nga delikado.. nga mahadlok ‘ta nga mapildi si Manny. Common ra kaayo kang Manny Pacquiao ang iyang estilo,” sulti ni Lariosa.
Nasayran nga gigunitan karon ni Ugas ang WBA belt nga nadaug ni Pacquiao gikan kang Keith Thurman niadtong 2019 bag-o kini nadeklara isip “champion in recess.”
RadyoMaN Kirby Manzon
