ILOILO- Nagpositibo sa random drug test si Boyet Acap, ang ginakabig High Value Target nga preso sa Iloilo District Jail sa Barangay Nanga, Pototan.
Lakip sa mga nagpositibo nga mga inmates sanday Randy Legazpi, Jovern Abantao kag Tomas Gan.
Si Boyet Acap amo ang bata sang High Value Target nga si Marque ‘Boboy’ Acap nga preso man karun sa IDJ-Pototan.
Kon madumduman, sang Oktubre 1, may nakit-an nga 8 ka sachets sang illegal nga droga nga nakatago sa trapo sa hagdan sang katre sa selda 51 nga ginatiniran sang mag-amay nga Acap.
Agud matapna ang padayon nga paggamit sang illegal nga droga sa sulod sang IDJ Pototan, gintingob na sugod kahapon ang 13 ka mga High Value Target (HVT) drug personalities sa Special Intensive Care Area (SICA) sang BJMP Nanga, Pototan.
