TACLOBAN CITY – Igpapatuman dayon han Department Of Interior and Local Government (DILG) an desisyon han Office Of the Ombudsman nga ipailarom ha unom kabulan nga preventive suspension hi Catbalogan City Mayor Stephany Uy Tan ngan iba pa nga lokal na opisyal han city hall, may paghisumpay han gin-aaligar overpriced nga tuna nga nagkakantidad hin P125 million.
Ha interview han RMN kan DILG Regional Office 8 Information Officer Myles Colasito, mayada ginsusunod nga mga adlaw an ira buhatan sanglit ira dayon ini igpapatuman.
“An aton ginhihimo hiton, basta umabot na ha aton an order tikang ha Office Of the Ombudsman diri ito hiya ginpapaiha kay mayada ito hiya pira kaadlaw nga ginsusunod ngan iginpapatuman dayon ito han DILG, diri la uga kami nagpapasabot tungod hiton security measures.
Basi ha desisyon han Ombudsman, “preventively suspended without pay” hi Mayor Tan ngan hira Vice Mayor Art Sherwin Gabon; Sangguniang Panglungsod Members Coefredo Uy, Jeffrey Uy, Maximo Pescos, Edward Uy, Christine Joy Escober, Beethoven Bermejo, ngan Nanette Jasmin; City Assessor Romero Tuazon, Assistant Assessor Arthur Macabare ngan tikang ha Office Of the Assessor nga hi Rizal Ignacio.
An mga nasabi nga ngaran in naatubang yana ha mga reklamo nga grave abuse of authority, grave misconduct, gross neglect of duty, ngan violation of code of conduct & ethical standards for public officials & employees.
Basi ha complainant nga hi Bernard Jake Ramos, an mga nasabi nga opisyal in pumalit hin tuna (agricultural lands) ha kantidad nga P120,225,000 bisan an market value hini in aada la ha P155,497.84
Sumala han Ombudsman, dida han October 14, 2015 in ginpasar han Sangguniang Panlunsod han Catbalogan an usa nga ordinansa ha pagpalit han tuna. Gin-aprubaran naman ini ni Mayor Tan dida han October 20, 2015.
Dugang ha pamahayag ni Colasito, mayada pa nabibilin nga mga konsehal han Catbalogan nga waray igpailarom ha preventive suspension, sanglit mayada la anay makapot ha posisyon nga mayor ngan Vice Mayor han syudad.
“Mayada pa hiya mga konsehal nga amu iton makakatindog as mayor and Vice-Mayor ngan as members of Sanggunian.”
Samtang, pag-iistudyuhan pa yana han DILG an magigin sitwasyon han desisyon han Ombudsman tungod nga bangin umabot ha May 2019 Local and National Elections an suspension han mga opisyal.
