TACLOBAN CITY – Nakatalaan nga umatinder hi Presidente Rodrigo Duterte ha Barangay Peace and Order Summit yana nga adlaw ha Palo, Leyte.
Sumala han Department of Interior and Local Government (DILG), ini in para mabatian han presidente an nasyunal ngan lokal nga isyu ngan ginkaka-atubang han kada barangay.
Paghihimangrawan ha nasabi nga summit an kampanya han gobyerno kontra ha illegal nga droga, kreminalidad, korapsyon ngan violent extremism.
Aabisuhan gihapon an mga barangay officials han ira mga responsabilidad ha ira mga ginsasakupan.
Tatagan gihapon hin higayon an mga barangay officials nga igpahayag an ira mga araba o isyu nga papamatian han mga opisyales tikang ha Malacanang.
Ginlalauman nga maabot ha 3,000 an matambong nga mga barangay officials tikang ha probinsya han Leyte, Biliran, Eastern, Western ngan Northern Samar.
