Davao City – Nanawagan karon ang mga nabiktima sa sunog sa Monfort Village, Purok 4 Barangay 19-B ngadto sa katawhan ug sa mga buot muhatag sa ilang mga donasyon nga apilan og sinina nga pang bata aron masuot sa ilang mga anak.
Sa pikighinabi sa DXDC RMN Davao sa mga biktima sa nasangpit nga fire incident area, kini ilang panawagan diin sagad matud pa sa ilang madawat nga mga donasyon mga dagko nga sinina hinungdan nga naglisod sila kung unsay ipasuot sa ilang mga bata nga nag edad og dos ngadto sa kwatro anyos.
Hinuon padayon ang paghatag sa City Social Services and Development Office kun CSSDO og hinabang sa mga apektadong pamilya sama sa foodpacks ug uban pa.
Kahinumduman nga miulbo ang sunog niadtong adlawng Miyerkules, Marso 7 sa nasangpit nga lugar nga miresulta sa walo ka mga panimalay ang totally damage samtang upat niini ang partially damage ug lakip nasunog duha ka sakyanan ug 25 ka mga pamilya ang naapektuhan.
Sa karon, padayon pang ginaimbestigahan sa Bureau of Fire Protection kun BFP ang hinungdan sa maong sunog.
RadyoMaN Don Pulayao
